«Адамдар автоматпен күзетіп тұрады» — Саяхатшы Ернар Алмабек Ауғанстанда таңғалдырған оқиғасын бөлісті
Ауғанстан десе, көз алдыңа қарулы адамдар елестейді. Танымал блогер, фотограф Ернар Алмабек Massaget.kz тілшісіне берген сұхбатында көзбен көрген Ауғанстан қандай екенін әңгімеледі.
Материалдың толық нұсқасын МЫНА СІЛТЕМЕ арқылы Massaget.kz сайтынан оқи аласыздар
Жуырда Ернар Алмабек Ауғанстанға саяхаттап барды. Бүгінде тәліптер билік құрып отырған бұл ел көпшілікке жұмбақ көрінеді.
Фото: instagram.com/yernar.almabek
Фотографтың сөзінше, бұл сапарына отбасы қарсы болған, дегенмен ешкімге айтпай виза жасатып, ақыр аяғында оларды да көндіріпті.
«Алматы-Дубай-Кабул деген рейспен Дубай арқылы 12 сағатта жеттім. Қайтар жолда да солай: Кабул-Дубай-Алматы. Негізі жермен де Тәжікстан арқылы келуге болады. Бірақ көлікпен жүру кішкене қиындау. Сол себепті ұшақпен келуді ұйғардым. Виза алу қиын емес, құжаттарды түгел дайындасаң, бір-екі аптада алуға болады. Бірақ менің жағдайымда шаруалар шығып қалып, консулдар бос болмай, виза алуым 1 айға созылып кетті. Былтыр қазанда келемін деп жоспарлаған едім. Бірақ қазанда келе алмай, басқа сапарлармен жолға шығып, биыл келу бұйырды», — деп әңгімеледі ол.
Ернар Алмабек Ауғанстанға кірерде паспортына белгі қойылғанын, саяхатшы болғандықтан, бұл болашақта мәселе тудырмайды деген сенімде екенін айтты.
«Паспортымда Израильдің визасы бар. Израильден кейін Ауғанстанға келуге болмайды дегенді қаншама жерден оқыдым. Бірақ, Құдайға шүкір, аман-есен Ауғанстанға келдім. Ешкім ештеңе деген жоқ», — деді ол.
Фото: instagram.com/yernar.almabek
Саяхатшы Ауғанстанда гидтердің көмегіне жүгінген.
«Жанымда 4 гид жүрді, жас жігіттер, жаңадан бастап жатыр екен. Олар барын салып көмектесіп жатыр. Менің рұқсат қағаздарымды да алып берген — солар. Мені тоқтатып жатса, тәліптермен келіссөз жүргізіп, сөйлесіп жатқан да солар. Ағылшын тілінде сөйлейді, менің ағылшыным сәл нашарлау, бірақ тіл табысып жатырмыз» — деді блогер.
Ауған асудағы мақсат не?
Ернар Алмабектің сөзінше, бұл жақта қазақтар да тұрады деп естіген соң басты мақсаты Ауғанстандағы қазақтарды видеоға түсіру болған.
«Кейін бұл ойым өзгерді. Бірінші Кабулды көрсетейін дедім, жергілікті адамдардың жағдайы қандай екен, соны көрейін дедім. Тарихи жерлерін көрейін деп Бамиан деген өлкесіне бардым. Ол жақ та әдемі екен. Кейін Мазари-Шариф қаласында тұратын қазақтарға бардым», — деді блогер.
Ауғанстанда өзіңе қауіп төндірмеудің, күдікті көрінбеудің бір амалы қызыл-жасыл киім кимеу, ең дұрысы жергілікті жұрттың киімін сатып алу екен. Саяхатшының сөзінше, мұнда 44 миллионға жуық адам тұрады, екі ресми тіл бар, тарихи, мәдение ескерткіш көп. Ал бұл елдің ұлттық валютасы ауғани деп аталады. Бір ауғани — 7 теңге.
Фото: instagram.com/yernar.almabek
«Адамдар автоматпен күзетіп тұрады»
Блогер Кабулдың әр көшесінде қарулы күзет тұрғанын, ал ең қызық әрі таңсық жайт қонақүйде болғанын әңгімеледі.
«Ұшақта отырып Кабулды, лашықтарды көрген кезде біртүрлі сезімде болдым. Тақыр дала болып көрінді. Ауғанстан деген осы екен ғой деп ойладым. Ұшақтан түскеннен кейін гидтер күтіп алды, қаланы араладық. Әр көшеде қарулы күзет тұрады. Қарулы адамдарды көрген кезде біртүрлі боласың. Ең қатты таңғалдырғаны: қонақүйге кіру үшін 4 күзеттен өтесің. Темір есіктер қойған, іштегі күзет кішкентай тесіктен сығалайды. Күзетшілер түгел денеңді тексереді, бүкіл затыңды сканерден өткізеді. Қонақүйдің сыртында адамдар автоматпен күзетіп тұрады. Сөйтсем бұл жердегі қонақүйлерге кіріп-шығудың ережесі сондай екен. Ішке біреу кіру керек болса, құжаттарын қатты тексереді, ішкі кірудің де себебі болу керек», — деді ол.
«Ауғанстан — бет алды келе беретін ел емес»
Саяхатшы Ауғанстанды соғыс жүріп жатқан, дамымай қалған ел ретінде елестеткенін, мұнда келу қауіпті деп ойлағанын жасырмады.
«Жалпы аз-маз қауіп бар, оны жоққа шығара алмаймын. Бірақ менің жолым болып, жақсы гидтер түсіп, дұрыс адамдармен танысып, солардың арқасында қиындықсыз жүрмін. Десе де Ауғанстан бет алды келе беретін ел емес», — деді ол.
Материалдың толық нұсқасын МЫНА СІЛТЕМЕ арқылы Massaget.kz сайтынан оқи аласыздар
Источник: tengrinews.kz
